是咁的，有朝返到診所，電話好識趣咁響起嚟…Lin~Lin~
喂喂，姑娘呀？我老婆話BB無咗心跳…咁點算呀？醫生返咗未？我哋即刻過嚟…
我當堂嚇一跳，然後冷靜咁同佢講醫生未有咁早返（當時係9點），你哋10點準時過嚟，比你哋第一個睇啦…
斷線後，我就知道晨早發生呢啲事，即係今日會係漫長嘅一日…
10點準時開門，一對體型有番咁上下嘅夫婦已經企喺門口，仲未嚟得切講早晨，佢哋已經衝咗入嚟問醫生返咗未？
我同佢哋講，陳生陳太，醫生就快返喇，都未講到下一句，陳太已經好似世界末日咁，好憂心咁坐喺等量血壓張櫈度…
我睇見連心都急埋，不過咁嘅情況，我都係要安撫咗陳太先…我都明白你依家又擔心又不知所措，醫生好快返到㗎喇，等檢查清楚先，唔好自己嚇自己…
陳太對我無力咁點一點頭…我就問佢，食咗早餐未呀？不如俾包餅你食？
陳太諗咗一諗，我未食呀…有啲餓…麻煩姑娘俾包餅我食…
我第一時間埋枱攞咗包餅俾陳太，一邊幫佢量血壓、驗小便，一邊心諗～醫生你好快啲返啦！
好嘞，醫生返咗之後，我第一時間陪陳生陳太見醫生…
HELLO，早兩日先見過你哋咋喎，有咩事？（醫生一臉慈父咁嘅樣）
醫生，我老婆話聽唔到BB嘅心跳，咁點算呀？（陳生急到有啲口齒不清）
聽唔到？你哋用咩嚟聽呢？（醫生繼續一臉慈父咁嘅樣）
陳生拎咗個贈品胎心機出嚟（贈品係我估嘅啫）
咁呀，扶你太太去床度做個檢查先…（我偷睇到醫生望住部機反咗一吓眼）
唧完啫喱喺肚，醫生用儀器偵測，一陣強而有力…非常澎湃嘅心跳就出現咗，陳生陳太呢，就已經流緊眼淚，係個種失而復得嘅喜悅，大到我都Feel到。
之後醫生問陳太，今朝用胎心機放喺邊個位？
陳太指住自己個胃話呢度（今次到我忍唔住反咗一吓眼，Sorry…）
陳生話我都有上下左右郁個位嚟搵下㗎…乜唔係咁嘅咩？
醫生忍住嘴角嘅笑容，用好專業嘅樣同佢哋講…
即係咁…你哋指嘅位呢，係胃嚟嘅…而家BB七個月大喇，正常位置係肚臍對下，放喺胃度係聽唔到BB心跳嘅。
醫生慈父地望一望陳太：加上肚嘅皮下脂肪比較厚嘅話，而呢部又唔係專業用嘅儀器，仲有你哋都未必識搵啱個位嚟聽…我唔建議你哋再用呢嘅機嘞…如果覺得BB郁少咗，就返邌俾我檢查…
陳生陳太最後當然甜笑住咁離開咗診所…我心諗，陀BB確係令到嘅嗲地媽咪好肉緊嘅…有啲胎心機真係玩具一件嚟啫，唔好盡信，盞自己嚇自己…當然，幾時都好，最緊要BB無事就最好啦！